September 10, 2024

September 10, 2024
Nubnuav Nyeem-Kawm Vaajtswv Txujlug

Nqailug Rua Nubnua

“Tej zaubmov yeej paab tsi tau kuas peb muab sab rau ntseeg Vaajtswv ntxiv; txawm yog peb noj lossis tsi noj los yeej tsi ua rua peb muab sab rau ntseeg ntxiv. Txawm yog le caag los puamchawj, mej yuavtsum ceevfaaj nyob tsaam mej cov kws muaj cuab kaav noj yaam nua yaam u ua rua cov kws muaj kev ntseeg tsawg xaav yuamkev.”— 1 Kauleethaus 8:8-9

Xaav Txug Tejlug Rua Nubnua

Yexus hab Paulus puavleej tau qha tas zaubmov hab dlejhaus tsi ua rua peb lug nyob ze Vaajtswv lossis txaav dleb Vaajtswv  — Yaam kws tawm huv peb lub sab lug ua rua huv lossis tsi huv (Malakaus 7:14-23; Kaulauxais 2:16). Puab tej lug qha txhais tas, peb muaj kev ywjpheej rua kev noj hab haus huv qaab Yexus Txujkev hlub. Txawm le ntawd los, peb kev ywjpheej yuav tsi tshem tau peb tej kev phem ntawm peb cov kwvtij hab nugmuag thaus peb lug nrug tug Tswv moog. Peb tsi muaj cuabkaav yuam coj puab moog ua txhum lossis ua lubco rua puab dlawm lug ntawm tej kev noj lossis kev haus. Ca peb sis kev ywjpheej moog coj kuas peb cov kwvtij hab nugmuag lug rua huv Yexus Khetos. Tejnuav yog tug ntseeg tshab yuav tsum tau muaj kev sis txhawbzug; puab tub yeej muaj yaam yuav ua rua puab dlawm.  Ca peb lug tsom ntsoov rua huv puab lub sab — yaam dlaabtsi kws tsimnyog peb ua lossis tsi ua, hab yaam twg yog yaam peb xaiv has, noj, hab haus. Ca peb ncu txug tas yaam dlaabtsi twg yog tsi lug ntawm kev ntseeg nwg kuj yuav muaj feem muaj tug coj peb moog ua txhum hab poob rua huv txuj kev txhum.  (Loos 14:22-23).

Thov Vaajtswv

Vaajtswv tug npuvnpos kev hlub, thov paab hab txhawb kuas kuv ua tau tug qauv zoo rua tug ntseeg tshab hab tug tseem muaj kev ntseeg tsawg pum. Thov tug Ntsujplig Dlawbhuv, muab lub tswvyim, kev txawjntse hab paab kuv tswj kuv lub sab kuas kuv ua tau tug qauv zoo rua lwm tug. Huv Yexus lub npe, Kuv thov. Amees.