Hmong Baptist National Association

September 13, 2024

—

by

HBNA Editor
in

September 13, 2024
Nubnuav Nyeem-Kawm Vaajtswv Txujlug

 

Nqailug Rua Nubnua

“Koj yuavtsum ncu ntsoov has tas thaus txug nub kws nplajteb yuav kawg, yuav muaj kev kub ntxhuv heev. Tej tuabneeg nyag yuav xaav txug nyag xwb, puab yuav xaav tsi txug lwmtwg le, yuav muaj tuabneeg ntshaw nyajtxag, yuav khaavtheeb, yuav muab hlub, tsi noog namtxiv lug, tsi ris lwm tug txajntsig, saib tsi taug kev ntseeg, tsi sis hlub, tsi zaam txim rua lwmtug, nyam taug xaiv, ua nruj ua tsiv, ua tuabneeg tsivtsaim, tsi nyam ua zoo; ua tuabneeg ntxeevsab, muaj lub sab heev, puab saib puab tsimtxaj dlua lwmtug, nyam kev lomzem heev dlua nyam Vaajtswv; puab ua txuj ua le puab yog cov ntseeg, tabsis puab tsi yog cov ntseeg tag. Koj tsi xob nrug cov tuabneeg zoo le ntawd uake ib zag le!” (2 Timautes 3:1-5)

Xaav Txug Tejlug Rua Nubnua

Koj yuav tau ceevfaaj cov tuabneeg khaavtheeb hab tej kev ntseeg cuav.  Tej kev khaavtheeb nuav yuav ua kuv, koj ua kev phem kws yog dlaab ntxwgnyoog tegnum. Nwg yog tug has ntxeev lug rua Vaajtswv tug Tub tej lug. Ntxwgnyoog has tas, “Tsi yog mej tug dlejsab, tabsis lawv le kuv tau ua tav.”  Nuav yog tej kws Dlaab muaj sim NkaujAb kws yog thawj zag kev sim huv lub vaaj Edees. Nwg tej lug dlaag has le nuav,  “Koj ua tej nuav, koj yuav zoo ibyaam le Vaajtswv”  (Chivkeeb 3:5). Nwg ua kuas NkaujAb khaavtheeb hab ntxeev sab rua Vaajtswv.

Txhua yaam kev ntseeg tsi tseeb hab kev dlaabqhua yog tsaa kuas peb muaj kev khaavtheeb hab ntxeev sab rua Vaajtswv.  Peb muaj coobtug muaj kev ntseeg, tabsis puab kev ntseeg tsuas yog puab ua rua puab tug kheej. Ntawd yog yaam kws puab xaav tau lug ntawm Vaajtswv.  Peb yuav tau tshuaj peb tug kheej hab leeg txim ntawm peb tej kev kws tau ua txhum rua ntawm Tswv Yexus Khetos.   Tuabneeg feemcoob huv Amelikas pum txug puab tug kheej, taug puab txuj kev moog rua ntujtawg, xaav txug puab tug kheej tas puab tub zoo txaus tsi taag yuav taabkaum lwm tug. Puab yeej tsi tau leeg pub tej kev txhum. Puab yeej tsi tau leeg txais yuav Yexus Khetos ua puab tug Tswv. Ntawd yog puab tsim dlua puab kev ntseeg, hab nwg yog kev ntseeg cuav kws yuav coj puab moog poob rua kev phomsij.

Kev Thov Vaajtswv

Ua Vaajtswv kws yog Leejtxiv tsaug rua koj txuj kev hlub hab taabncuab. Kuv qhuas koj, thov koj zaam txim rua kuv. Thov pub koj tug Ntsugjplig Dlawbhuv lug coj kuv, qha kuv, hab paab kuas kuv ua tau lubneej le koj tug qaum, yaam zoo le Yexus. Huv Nwg lub npe. Kuv thov, Amees.