December 3, 2024

Nubnuav Nyeem-Kawm Vaajtswv Txujlug

December 3, 2024 

 “Ca ua rua mej txhua tug paub, hab rua ib tsoom tuabneeg Ixayees paub has tas, tub yog Yexus Khetos tug kws yog tuabneeg Naxales lub fwjchim ua rua tug txivneej kws sawv ntawm mej xubndlag nuav zoo ntaag. Yexus yog tug kws mej muab ntsa rua sau ntoo khaublig, hab yog tug kws Vaajtswv tsaa sawv huv qhovtuag rov qaab lug. Muaj lug sau ca rua huv txujlug has txug Yexus has tas, ‘lub pobzeb kws cov kws ua tsev muab xyeeb tseg, nwgnuav luas tub muab lub ntawd lug teeb ua kaumtsev lawm.’ Tsi muaj ib tug twg huv nplajteb nuav cawm tau tuabneeg dlim tuabneeg lub txim, tsuas yog Vaajtswv tug tub Yexus tuab leeg xwb txhaj cawm tau peb dlim.” Tegnum 4:10-12

 Xaav Txug Tejlug Rua Nubnua

Xalaumoo ua lub tuamtsev kws tsi siv rauj ntsa kuas muaj lub suab nrov thaus lub sijhawm nwg ua ntawd. Cov pobzeb kws yeej ua tuabzoo txaug zoo zoo hab coj lug rua ntawm thaajchaw ua lub tuamtsev ntawd cov ua haujlwm tsuas yog nqaa lug dlho hab tum kuas ruaj.  Ibqhov kws saib txawv kawg yog nyob rua ntawd muaj lub kaumtsev ua caag tsi muaj ib lub pobzeb kws puab txaug lawm lug dlho hum lub qhov ntawd. Tsi muaj leejtwg paub tas vim le caag txhaj ua le ntawd, yuav ua lecaag txhaj dlho lub qhov ntawd.  Nwg yog ib lub pobzeb kws seem txhwjxeeb, nwg yeej muaj le ntawd. Thaus kawg, tug tswjsaib ua lub tsev ntawd txhaj has tas, “Cov txivneej, muab lub pobzeb rhem ntawm qhovchaws ntawd.” Puab txhaj muab lub pobzeb ntawd rhem tawm ntawm lub kaum kws ua lub tuamtsev, thawb moog rua ib caag, hab dlov dlog moog rua lub kwvhaa Kisloos.

Thaus puab ua lub tuamtsev tub yuav tav kuj yog lub sijhawm lug dlho lub pobzeb rua ntawm lub kaumtsev. Puab has tas, “Dlov lub pobzeb lug dlho rua lub kaum, peb npaaj txhij lawm.” tabsis tsi muaj lub pobzeb nyob ntawd. Koj xaav nib nwg moog nyob rua qhovtwg lawm? Nyob nraag kwjhaa.  Ntawd yog txujlug nuav tau has txug. Lub pobzeb kws tug kws ua tsev pum kuj yog tsi pum dlaabtsi dlhau lug ua tau lub pobzeb cegkaum tsev ntawd, dlaim txagzeb ntawm lub tuamtsev.

Petus has tas, Noog kuv has, koj xaav kuas kuv qha koj tas yuav ua lecaag txhaj ua tej nuav tav? Lub pobzeb kws tub muab xyeeb tseg, Yexus Khetos lub pobzeb muajsa, yog lub cegkaum tsev lub pobzeb, Nwg yog tug kws ua rua txivneej lubcev tavlog. Nwg yog tug Tswv sawv huv qhovtuag lug. Nwg yog tug Tswv tug muajsa nyob. Kuv xaav kuas koj paub tas yog has tas koj yog tug Ntseeg, Yexus, tug muajsa nyob, nyob huv koj. Yog peb muaj tau nwg lub nyob huv peb lub plawv.! Peb tsi yog yuav has txug nwg; Yexus yog tug muajsa hab paub meem tas nwg nyob huv koj.

Thov Vaajtswv

O Vaajtswv tug muaj fwjchim, ib puas tsaavyaam yog koj tug. Txhua yaam kws koj tsim yog ua rua peb paub tas koj yog tug muaj fwjchim. Ua koj tsaug thov koj siv kuv kuas kuj yog cov twj kws yog koobmoov zoo rua coobtug lug pum txug koj lub fwjchim hab lug cuag tau koj. Huv Yexus lub npe, kuv thov. Amees.